ईन्द्रसराेवरबाट हेटाैंडा-काठमाडौं यातायात संचालन

शनिबारबाट मकवानपुरको इन्द्रसरोवरबाट काठमाण्डौ र हेटौँडाको लागि सार्वजनिक यातायात सञ्चालन भएको छ । कोरोना भाइरसको संक्रमण फैलन नदिनको लागि सरकारले गरेको लकडाउन र निषेधाज्ञाको कारण लामो तथा छोटोदुरीका यातायात करिब ६ महिनादेखि बन्द रहेको थियो । भदौ २९ गते बसेको मन्त्रिपरिषद् बैठकले असोज १ गतेबाट लामो दूरीका सवारी चलाउन दिने निर्णय गरे अनुसार अशोज ३ गते शनिबारबाट इन्द्रसरोवरमा लामोदुरीका बसहरु सञ्चालन भएको हो । 

इन्द्रसरोवर गाउँपालिकाको कुलेखानीबाट बज्रबाराही–पालुङहुँदै हेटौँडासम्म र कुलेखानीबाट बज्रबाराही हुँदै नौबिसे–काठमाण्डौसम्म जाने २ वटा बस आजबाट चल्न ठालेको हो । यी दुई बस कुलेखानी कलंकीबाट बिहान ८ बजे छुट्ने नारायणी यातायात व्यवसायी संघको बज्रबाराही काउन्टरका इन्चार्ज प्रेमकृष्ण जोशीले बताउनु भयो । यस्तै काठमाण्डौबाट बिहान ११ बजे र हेटौँडाबाट पनि बिहान ११ बजे सोही रुटबाट कुलेखानीका लागि बस छुट्ने छ । 

भौतिक पूर्वाधार तथा यातायात मन्त्रालयले लामो दुरीमा चल्ने सवारी साधनले सिट क्षमताको ५० प्रतिशतमात्र यात्रु राख्नुपर्ने, ५० प्रतिशतसम्म बढी भाडा लिन पाइने, सवारीमा एउटा लहरमा मात्र यात्रु बसाउन पाइने, कोरोना रोकथामका न्युनतम मापदण्ड अनुसार यात्रुहरूले अनिवार्य मास्क लगाउनु पर्ने, ढोका र गाडीभित्र पनि स्यानिटाइजरको व्यवस्था गर्नुपर्ने लगायतका सवारी सञ्चालन सम्बन्धी मापदण्ड बनाएको छ । सोही बमोजिम नै यी बस सञ्चालन भएको इन्चार्ज जोशीले बताउनुभयो । कुलेखानीबाट फाखेल हुँदै काठमाण्डौ र भिमफेदी हुँदै हेटौँडाको रुटमा भने अहिले तत्कालको लागि बस चलाउन नसकिएको उहाँले बताउनुभयो ।