आज "थाहा" अभियानका अभियन्ता रुपचन्द्र विष्टको २२ औं स्मृति दिवस

आज थाहा अर्थात चेतना जनाउने अभियान का अभियन्ता रुपचन्द्र विष्टको २२ औं स्मृति दिवस विविध कार्यक्रम गरेर मनाईदै छ । ‘निष्पक्ष सकृयताको अभ्यास’ थाहालाई जनस्तरसम्म पुर्याई लोकप्रिय र जनप्रिय बन्न सफल हुनु भएका थाहा आन्दोलनका प्रणेता रुदानेको जन्म वि स १९९० पौष २६ गते मकवानपुरको तत्कालिन दामन गाविस अर्थात हाल थाहा नगरपालिका ३ घर्तिखोलामा भएको थियो ।

सम्भ्रान्त परिवारमा जन्मनु भएका दार्शनिक नेता विष्ट राष्ट्रिय पञ्चायतका सदस्य समेत बन्नु भएको थियो भने उहाँले गरिब, दुखी, किसान र मजदुरको पक्षमा राजनीति गर्नु हुन्थ्यो । स्वभावैले समाजको परिवर्तन चाहने बिद्रोही स्वभावका विष्ट समाज परिवर्तनका एक योद्धा, सिद्धान्तका ज्ञाता तर सिद्धान्तलाई रटेर होइन ब्यबहारमा आफैबाट प्रयोग गरेर देखाउनु पर्दछ भन्ने मान्यता राख्नु हुन्थ्योे ।

उहाँ सामजिक द्रस्टाका रुपमा समेत परिचित हुनुहुन्थ्यो । जनमुखी राजनीति गरेर पटक पटक जेल जीवन विताएका रुदानेले हालका प्रधानमन्त्री केपी शर्मा ओलीसँग समेत जेल जीवन बिताउनु भएको थियो । जनमुखी नेता रुदानेको २०५६ साल असार ७ गते निधन भएको थियो । रुपचन्द्र बिष्टलाई रुदाने, स्वरुपे, जसरु जस्ता नामले पनि चिनिन्छ । थाहानगरपालिकाको बिकासमा रुपचन्द्रको महत्त्वपूर्ण योगदान छ । बिकास घर, जनकल्याण माबि, निर्माणमा उहाँको योगदान छ ।