बागमती प्रदेशको मुख्यमन्त्रीमा राजेन्द्र पाण्डेको दाबी, पाण्डे मुख्यमन्त्री बन्ने निश्चित

कात्तिक १०/ बागमती प्रदेशको मुख्यमन्त्रीको लागि ५९ जना सांसद्को हस्ताक्षरसहित राजेन्द्र पाण्डेले दावी पेश गरेका छन् । 

नेकपा (एकीकृत समाजवादी) पार्टीको संसदीय दलका नेता पाण्डेले प्रदेशसभामा रहेका ४ वटा दलको समर्थनमा मुख्यमन्त्री पदमा दावी पेश गरेका हुन् । 

नेता पाण्डेले नेपाली काँग्रेस, नेकपा माओवादी केन्द्र र जसपाका ५९ सांसदहरुको समर्थनमा मुख्यमन्त्री पदमा दावी पेश गरेका हुन् । 

बागमती प्रदेशकी मुख्यमन्त्री अष्ठलक्ष्मी शाक्यले नेपालको संविधानको धार १६७ को उपधारा १ को (क) अनुसार आफ्नो पदबाट राजिनामा दिएपछि प्रदेश प्रमुख यादव चन्द्र शर्माले राजिनामा स्विकृत गर्दै प्रदेशको मुख्यमन्त्री पदमा नियुक्तिको प्रयोजनका लागि दाबी पेश गर्न आह्वान गरेका थिए । शर्माले बिहीबार अपरान्ह ३ बजेभित्र आफ्नो दाबी पेस गर्न आह्वान गरेका थिए ।

सोही अनुसार बुधबार नै पाण्डेले काँग्रेस, नेकपा माओवादी केन्द्र र जसपासहितका सांसदको समर्थनमा मुख्यमन्त्री पदमा दावी पेश गरेका हुन् । 

प्रदेश प्रमुख शर्माले जारी गरेको पत्र अनुसार प्रदेशसभामा कुनै पनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रदेश सभाको सदस्यलाई आफ्नो दावी पेश गर्नुपर्ने हुन्छ ।

बागमती प्रदेशकी मुख्यमन्त्री अष्टलक्ष्मी शाक्यले राजनीतिक संस्कार कायम राख्ने भन्दै बुधबार प्रदेश प्रमुख यादवचन्द्र शर्मासमक्ष राजिनामा पेश गरेकी थिएन् । 

उनले बागमती प्रदेशको प्रदेशसभा बैठकलाई सम्बोधन गर्दै राजिनामाको घोषणा गरेकी थिएन् । 

गत भदौ २ गते नेकपा एमालेको तर्फबाट मुख्यमन्त्री बनेकी शाक्य भदौ २५ गते बागमती प्रदेशसभा सचिवालयमा नेकपा एकीकृत समाजवादी पार्टीलाई मान्यता दिँदै निर्वाचन आयोगको पत्र दर्ता भएसंगै अल्पमतमा परेकी थिएन् ।

शाक्य नेतृतवको सरकार अल्पमतमा परेसंगै ३० दिन भित्र संसदबाट विश्वासको मत लिनुपर्ने वाध्यता रहेको थियो । सोही अनुसार मुख्यमन्त्री शाक्यले गत असोज २४ गतेको प्रदेशसभा बैठकमा नेपालको संविधानको धारा १८८ को २ अनुसार विश्वासको मत लिन प्रस्ताव पेश गरेकी थिईन। 

सो प्रस्ताव माथि कात्तिक ४ गतेको प्रदेश सभा बैठकमा दलगत रुपमा छलफल भएको थियो भने आज बुधबार बसेको बैठकमा मत विभाजन हुने कार्य सूचि रहेको थियो । 

बागमती प्रदेशसभामा १०९ जना सांसद रहेका छन् । प्रदेश सरकार गठनका लागि ५५ सांसद आवश्यक हुन्छ ।

बागमती प्रदेशमा एमाले सभामुखसहित ४३ जना संसद् रहेका छन् । स–साना दलहरुको ८ जना संसद् रहेका छन् । जसमा विवेकशिल साझाको ३ जना, राप्रपा र नेमकीपाको २/२ र जसपाको १ जना सांसद् रहेका छन् । 
जसपा पनि गठबन्धनमा रहेको छ । 

सोही अनुसार गठबन्धनको कुल ५९ मत हुन जान्छ । जसमा माओवादी केन्द्रको २३, काँग्रेसको २२, एकीकृत समाजवादीको १३ सांसदहरु रहेका छन् ।