बागमतीका नवनियुक्त मुख्यमन्त्रीको शपथ भोलि

मकवानपुर । बागमती प्रदेशका नवनियुक्त मुख्यमन्त्री शालिकराम जम्कट्टेलले मंगलबार पद तथा गोपनीयताको शपथ लिने भएका छन् । प्रदेश प्रमुख यादवचन्द्र शर्माले भोलि बिहान ९ः३० बजे मुख्यमन्त्री जम्कट्टेललाई शपथ दिलाउने कार्यक्रम रहेको प्रदेश प्रमुखको कार्यालय स्रोतले जनाएको छ । 

मुख्यमन्त्री जम्कट्टेलले भोलि नै तीन सदस्यीय मन्त्रिपरिषद गठन गर्ने जनाइएको छ । स्रोतका अनुसार प्रदेश सरकारमा तत्काल राप्रपा र एमालेबाट एक–एक जनाको प्रतिनिधित्व हुने भएको छ । यद्यपि उनीहरुलाई मन्त्रिपरिषदमा विभागीय जिम्मेवारी भने तत्काल नदिइ सबै मन्त्रालयको जिम्मेवारी मुख्यमन्त्री आफैले सम्हाल्ने स्रोत बताउँछ ।

‘सुरुमा राप्रपाबाट एक र एमालेबाट एक मन्त्री बनाउने तयारी भएको छ,’ स्रोतले भन्यो, ‘उनीहरुलाई दिइने जिम्मेवारी र बाँकी मन्त्री नियुक्तिको काम भने सत्तारुढ गठबन्धनबीच भागबण्डा टुंगिएपछि मात्र हुने छ ।’

एमालेले पहिलो चरणमा सरकारमा जगन्नाथ थपलियालाई पठाउने तयारी गरेको छ । यद्यपि, राप्रपाबाट भने कसलाई सामेल गर्ने भन्नेबारे टुंगो लाग्न बाँकी रहेको बताइएको छ ।

भागबण्डामा छैन सहज

सत्तारुढ गठबन्धनबीच भागबण्डामा त्यति सहज अवस्था भने देखिएको छैन । ११ सदस्यीय मन्त्रिपरिषद कायम राख्ने तयारी भए पनि दलहरुले माग गरेको मन्त्रालयको संख्याका आधारमा भागबण्डा चुनौतीपूर्ण देखिएको हो । एमालेले पाँच मन्त्रालय पाउनुपर्ने दाबी गर्दै आएको छ । यस्तै, राप्रपा र नेकपा एकीकृत समाजवादीले दुई–दुई मन्त्रालयमा दाबी गरेका छन् । यस्तै, हाम्रो नेपाली पार्टीले पनि एक मन्त्रालयको दाबी गरेको छ । माओवादी केन्द्रले मुख्यमन्त्री बाहेक नै चार मन्त्रालयमा दाबी गर्दै आएको छ ।