थाहानगर नेकपाको जोड अन्नबालीमा

कोरोना भाइरस–कोभिड १९ संक्रमणबाट जोगिन मुलकभर लकडाउन जारी रहेको बेला थाहानगरमा उत्पादित तरकारी विक्रीवितरणमा समस्या आउनसक्ने भन्दै थाहानगरमा रहेका नेकपा जिल्ला कमिटी सदस्यहरुको बैठकले अन्नबालीमा जोड दिनुपर्ने निष्कर्ष निकालेको छ । 

हाल उत्पादन भइरहेकै तरकारीको बजार व्यवस्थापन गर्न हम्मे परिरहेको र लागतको तुलनामा लाभ कम हुने देखिएकोले अबको विकल्प अन्नबाली भएको बैठकले निष्कर्ष निकालेको हो । उत्पादन भएको तरकारी बजारीकरणमा समस्या भएको र अधिकाँश किसानहरु नगदे तरकारी खेतीतर्फ आकर्षित भइरहेकोमा भविष्यमा थाहानगरमा खाद्य संकट उत्पन्न हुनसक्नेमा पनि नेकपाले चिन्ता व्यक्त गरेको छ । 

नेकपा थाहा नगर कमिटी अध्यक्ष अरुण रायमाझीको अध्यक्ष्यता, बागमती प्रदेश सचिवालय सदस्य विष्णु विष्टको प्रमुख आतिथ्यता तथा प्रदेश कमिटी सदस्य महेश्वर सुवेदीको विशेष आपतथ्यमा भएको थाहास्थित जिल्ला कमिटीसदस्यहरुको बैठकले थाहानगरमा खाद्य संकटको सामना गर्न अन्न बालीमा जोड दिनुपर्ने निष्कर्ष निकालेको हो । 

बैठकले गत चैत ११ गते लकडाउन घोषणा भएयता थाहानगरमा भएको कोरोना भाइरस रोकथाम र नियन्त्रणसम्बन्धी गतिविधिहरुको समीक्षासमेत गरेको छ । बैठकमा नेकपा जिल्ला कमिटी सचिवालय सदस्य एवम् थाहा नगर प्रमुख लवशेर विष्टले लकडाउनको अवस्थामा थाहानगरको कोरोना रोकथाम तथा नियन्त्रणसम्बन्धी पहलहरुबारे जानकारी गराएका थिए । 

बैठकमा नेकपा जिल्ला कमिटी सदस्यहरु राजु नापित, लक्ष्मण विष्ट, कल्याण विक्रम घलान, ठूलीमाया गोले, तारा सिन्तान लगायत सहभागी थिए ।