नेकपा एमाले थाहानगरको नेतृत्व चयनका लागि संभावित उमेद्वारहरुको चर्चा हुन थालेको छ । यहि २८ फागुनमा हुने नगर अधिवेशनले एमाले थाहाले नयाँ नेतृत्व पाउने छ । नयाँ नेतृत्वका लागि अहिले ५ जनाको बढि चर्चा रहेको छ ।

एमाले नगर अध्यक्ष पदका लागि सुरेन्द्रमान प्रधान, कल्पना बलामी, अच्युतम प्रसाद ढकाल, गुप्त बहादुर कार्की र बिमलकुमार ढकालको चर्चा रहेको छ । प्रधान र बलामी हालका एमाले मकवानपुर जिल्ला सदस्य समेत हुन् । अच्युतम प्रसाद ढकाल थाहानगर अध्यक्ष हुन् भने कार्की २०७४ को स्थानीय तहबाट निर्वाचनमा थाहा–२ मा एमालेबाट निर्वाचित वडाध्यक्ष हुन् । बिमल कुमार ढकाल एमाले मकवानपुरका पूर्व जिल्ला सदस्य हुन् ।

२३ फागुनमा भएको नगर अधिवेशन आयोजक कमिटीको सचिवालय बैठकम े अधिवेशनका लागि प्रदेश सदस्य तथा थाहानगर ईञ्चार्ज इन्द्रमान स्याङ्तानको अध्यक्षतामा ९ सदस्यीय अध्यक्षीय मण्डल गठन गरिसकेको छ । अध्यक्ष मण्डलमा सुवास चन्द्र ठकुरी, नारायण रिजाल, श्यामभक्त श्रेष्ठ, बुद्धरत्न मानन्धर, शशीधर सुवेदी, शिवराम थापा, हरि गोपाली र विष्णु प्रसाद ढकाल रहेका छन् । अध्यक्ष मण्डलले अधिवेशन अघि नै सम्भावित उमेदवारहरुबीच छलफल गरी सर्वसम्मत नेतृत्व चयनको प्रयास गरिने जनाएको छ ।

अधिवेशनको उद्घाटनका लागि एमालेका वरिष्ठ उपाध्यक्ष तथा पूर्व उपप्रधानमन्त्री ईश्वर पोखरेलले उद्घाटन गर्ने कार्यक्रम तय भएको छ । अधिवेशनका लागि थाहाका सबै वडाहरुबाट १ सय ७६ प्रतिनिधि छानिएका छन् भने अधिवेशनमा जनवर्गीय संगठनहरुबाट ३र३ जना र ५ प्रतिशत प्रतिनिधि मनोनित हुने व्यवस्था छ ।