आजदेखि लम्पिस्किन बिरुद्धको सप्ताहब्यापी खोप अभियान सुरु,

बागमती प्रदेशको कृषि तथा पशुपन्छी विकास मन्त्रालयले आजदेखि प्रदेशका १३ जिल्लामा लम्पी स्किन रोग विरुद्ध सप्ताहव्यापी खोप अभियान सञ्चालन गर्ने भएको छ ।
पशुमा लम्पी स्किन रोगको संक्रमण हुन नदिन मन्त्रालयले श्रावण २५ देखि ३१ गतेसम्म सप्ताहव्यापी खोप अभियान सञ्चालन गर्न लागिएको बिहीबार मन्त्रालयमा आयोजित पत्रकार सम्मेलनमा जानकारी गराइएको छ । यस अभियान अन्तर्गत प्रदेशका ७६ हजार २ सय ७५ पशुमा लम्पी स्किन रोग विरुद्धको खोप लगाउने तयारी रहेको बताइएको छ । भेटेरिनरी अस्पताल तथा पशु सेवा विज्ञ केन्द्रहरु मार्फत खोप अभियान सञ्चालन हुनेछ । मकवानपुरगढी स्थित कृषि फार्ममा रहेको गाईलाई खोप लागाएर मन्त्रालयले अभियानको औपचारिक सुरुवात गर्ने जनाइएको छ । पत्रकार सम्मेलनमा बोल्दै मन्त्री प्रकाश श्रेष्ठले प्रदेशको ६६ वटै निर्वाचन क्षेत्रमा खोप अभियानलाई तीव्रता दिइने बताउनुभयो । लम्पी स्किन रोगलाई नियन्त्रण भन्दा पनि निर्मुल पार्ने उद्देश्यले खोप दिन लागिएको उहाँको भनाई छ ।
नेपालमा लम्पी स्किन रोगका कारण ७५ अर्ब ४८ करोडको आर्थिक क्षती भएको तथ्यांक छ । लम्पी स्किन रोगको खास उपचार नभएकाले यसको नियन्त्रणको लागि सबैभन्दा प्रभावकारी पद्धति खोप नै रहेको मन्त्रालयले जनाएको छ ।