शिशु पोषण सुरक्षाका लागि स्तनपान प्रवर्द्धनमा जोड, BMS ऐनबारे सरोकारवालालाई अभिमुखीकरण

थाहा नगरपालिका क्षेत्रमा शिशुको स्वास्थ्य र पोषण सुरक्षालाई केन्द्रमा राख्दै पोषण कार्यक्रम अन्तर्गत स्तनपान तथा “आमाको दूधको प्रतिस्थापन गर्ने वस्तु (BMS)” सम्बन्धी ऐनबारे अभिमुखीकरण कार्यक्रम सम्पन्न गरिएको छ । कार्यक्रम प्राथमिक स्वास्थ्य केन्द्रको सभाहलमा आयोजना गरिएको हो ।
कार्यक्रमको आयोजना बागमती प्रदेश सरकार स्वास्थ्य मन्त्रालय अन्तर्गत जनस्वास्थ्य कार्यालय मकवानपुरले गरेको थियो । कार्यक्रममा सञ्चारकर्मी, औषधि व्यवसायी, किराना व्यवसायी तथा स्वास्थ्यकर्मीहरुको सहभागिता रहेको थियो ।
अभिमुखीकरणका क्रममा जनस्वास्थ्य निरीक्षक बासुदेव रिमालले शिक्षित महिलाहरुले आफ्ना शिशुलाई स्तनपान गराउने तथ्याङ्क उत्साहजनक रहेको उल्लेख गर्दै आमाको दूधलाई प्रतिस्थापन गर्ने वस्तुको प्रयोग न्यूनीकरण गर्न आवश्यक रहेको बताए । उनले शिशुको शारीरिक, मानसिक तथा बौद्धिक विकासका लागि आमाको दूध नै सर्वोत्तम पोषण भएको धारणा राखे ।
त्यसैगरी जनस्वास्थ्य निरीक्षक रामनाम थिङले “आमाको दूध प्रतिस्थापन गर्ने वस्तु बिक्री वितरण नियन्त्रण ऐन, २०४९” अन्तर्गत रहेका कानुनी व्यवस्थाबारे विस्तृत जानकारी गराएका थिए । उनले स्तनपानको संरक्षण तथा प्रवर्द्धन, आमाको दूध प्रतिस्थापन गर्ने वस्तुको बिक्री–वितरण नियमन तथा शिशुको पोषण सुरक्षाका विषयमा ऐनले व्यवस्था गरेका प्रावधानबारे स्पष्ट पारे ।
कार्यक्रममा आमाको दूध प्रतिस्थापन गर्ने वस्तु भन्नाले आमाको दूधको सट्टा आंशिक वा पूर्णरुपमा खुवाउन बिक्री गरिने खाद्य वस्तुलाई बुझाइने जानकारी दिइएको थियो । साथै “बच्चा” भन्नाले जन्मेदेखि १२ महिनासम्मका शिशुलाई जनाइने उल्लेख गरिएको थियो ।
बाल आहार सम्बन्धी सूचना तथा शिक्षा, स्वास्थ्यकर्मी र स्वास्थ्य संस्थाको दायित्व लगायतका विषयमा समेत सहभागीहरुलाई जानकारी गराइएको कार्यक्रममा स्तनपानको महत्वबारे जनचेतना अभिवृद्धि गर्दै शिशु पोषण सुरक्षामा सबै पक्ष जिम्मेवार बन्नुपर्नेमा जोड दिइएको थियो ।