पालुङ प्राथमिक स्वास्थ्य केन्द्रले बिपन्न बिरामीका लागि ‘बिपन्न कोष’ छुट्याउने निर्णय

पालुङ । पालुङ प्राथमिक स्वास्थ्य केन्द्रको व्यवस्थापन समितिको बैठकले आर्थिक वर्ष २०८२/०८३ का लागि बिपन्न बिरामीहरूको उपचार सहयोगका उद्देश्यले विशेष ‘बिपन्न कोष’ छुट्याउने निर्णय गरेको छ।
बैठकले स्वास्थ्य केन्द्र व्यवस्थापन समितिको कोषबाट वार्षिक दुई लाख रुपैयाँ बिपन्न कोषका रूपमा विनियोजन गर्ने निर्णय गरेको हो। सो कोषबाट बिपन्न बिरामीहरूलाई प्रती बिरामी तीन हजार रुपैयाँ आर्थिक सहयोग उपलब्ध गराइनेछ।
व्यवस्थापन समितिका सदस्य उर्मिला गोपालीका अनुसार, आर्थिक अभावका कारण उपचारमा समस्या भोगिरहेका नागरिकलाई राहत प्रदान गर्ने उद्देश्यले उक्त निर्णय गरिएको हो। उनले यस निर्णयले स्थानीय स्तरमा स्वास्थ्य सेवामा पहुँच बढाउन सहयोग पुग्ने विश्वास व्यक्त गरिन्।
स्वास्थ्य केन्द्रले आवश्यक प्रक्रिया पूरा गरेका बिपन्न बिरामीहरूलाई प्राथमिकताका आधारमा सहयोग उपलब्ध गराउने जनाएको छ। स्थानीय समुदायको स्वास्थ्य सुरक्षालाई मजबुत बनाउने दिशामा यो निर्णय महत्वपूर्ण कदमको रूपमा लिइएको छ।