नेकपा थाहा इन्चार्ज ढकालको पिसिआर रिपोर्ट नेगेटिभ

नेपाल कम्युनिष्ट पाटी(नेकपा) मकवानपुरका सचिवालय सदस्य एवम् थाहा नगर इन्चार्ज विष्णुप्रसाद ढकालको पिसिआर रिपोर्ट नेगेटिभ आएको छ । 

गत भदौ १ गते स्वाव दिएकोमा आज आइतबार पिसिआर विधिबाट परीक्षण गर्दा रिपोर्ट नेगेटिभ आएको उहाँले थाहापाटीलाई जानकारी दिनुभयो । रिपोर्ट नेगेटिभ आएपछि फेसबुक वालमा समेत जानकारी  गराउँदै उहाँले आफ्नो सम्पर्कमा आएकाहरुलाई ढुक्क रहन भन्नु भएको छ । 

गत साउन २३ गते उहाँसँगै थाहानगर आएका ग्लोबल आइएमई बैंक हेटौंडा शाखाका व्यवस्थापकलाई कोरोना पुष्टि भएपछि ढकाल घरमै एकान्तबासमा रहनुभएको थियो । थाहापाटीले कोरोना पुष्टि भएका ग्लोबल आइएमई बैंकका शाखा प्रमुखको  थाहानगरको ट्राभल हिस्ट्रीसम्बन्धी ‘न्यूज स्टोरी’ प्रकाशित गरेपछि थाहानगरमा हल्लीचल्ली मच्चिएको थियो । लगत्तै सम्पर्कमा आएका व्यक्तिहरुको नमुना संकलन गरी पठाएकोमा सबैको रिपोर्ट नेगेटिभ आइसकेको छ । 

राजनीतिकर्मी ढकालकै गाडीमा ग्लोबल आइएमइ बैंकका शाखा प्रमुख थाहा नगर आएको जानकारी पाएपछि कतिपयले ढकाललाई ‘थाहानगरमा कोरोना ल्याएको’ भनी टिप्पणी गरेका थिए । ‘थाहानगर आएर हेटौंडा फर्किएपछि मलाई कतिपयले नराम्रो ढंगले प्रस्तुत गरे, मेरो पिसिआर रिपोर्ट नेगेटिभ आएको छ,’ थाहापाटीसित कुरा गर्दै ढकालले भन्नु भयो । 

ढकालले साउन २३ गते हेटौंडाबाट थाहानगर आउँदा थाहा नगरपालिका पुगेर नगरप्रमुख र केही वडाअध्यक्षहरुलाई समेत भेट्नुभएको थियो । हेटौंडाबाट आउनेजाने क्रममा ढकालले झण्डै ८ घण्टाको समय ग्लोबल आइएमइका शाखा प्रमुखसँग बिताउनु भएको थियो ।