थाहा नगरपालिका द्वारा बजार अनुगमनलाई निरन्तरता दिदै

थाहा नगरपालिकाले नगर भित्रका विभिन्न ठाउँमा बजार अनुगमनलाई तिब्रता दिएको छ ।  नगरपालिकाले ठूला चाडपर्वको पूर्वसन्ध्यामा बजारमा म्याद गुज्रिएका सामानहरु विक्री वितरण हुन सक्ने अवस्थालाई ध्यान दिदै अनुगमनलाई तिब्रता दिएको हो । नगरपालिकाले बिहीवार र शुक्रबार नगरपालिकाको शिखरकोटमा रहेको पसलहरु अनुगमन गरेको छ ।

अनुगमनका क्रममा म्याद गुज्रिएको सामान जफत गरिएको र तेस्तो सामान बिक्री नगर्न सचेत गराइएको अनुगमन समितीका सदस्य उमेश श्रेष्ठले बताए।उनका अनुसार खाद्य सामाग्रीमा म्याद हेर्ने सचेतता उपभोक्तामा बढेको पाइयतापनी सौन्दर्य तथा कस्मेटिक सामानमा म्याद गुज्रिएको पाइएको बताए।

थाहा नगरपालिकाका प्रमुख प्रशासकीय अधिकृत कृष्ण गिरीले बजार अनुगमनमा आमउपभोक्ताको अपेक्षा अनुसार नभए पनि विगतको तुलनामा सुधार भएको दाबी गर्नुभयो। गिरीले स्वयम् उपभोक्ता सचेत नभएसम्म बजार अनुगमनले मात्रै बजार आमउपभोक्ताले चाहे जस्तो सुधार गर्न नसकिने बताउनुभयो ।

नगरपालिकाले म्याद गुज्रेका,सडेगलेका,अखाद्य वस्तु बिक्री गर्दै आएका तथा बिना इजाजत व्यवसाय सञ्चालन गरिरहेका माथि कडाइ सुरु गरेको जनाएको छ। थाहा नगरका विभिन्न स्थानका बजारमा छड्के अनुगमनलाई तीव्र पारिने नगरपालिकाले जनाएको छ। नगरपालिकाले अहिले पनि बजार अनुगमनलाई परम्परा शैलीमा खुद्रा पसलमा केन्द्रित गरेको छ। उपभोक्ता ठग्ने ठूला व्यवसायलाई कडाइका साथ अनुगमन गर्नुपर्ने तथा स–साना व्यवसायमा मात्र अनुगमन केन्द्रित नगर्न स्थानीय व्यापारीको भनाइ रहेको छ।