थाहामा समुदाय स्तरमा कोरोना फैलिन नदिनेबारे छलफल

थाहानगरमा कोरोना भाइरस रोकथाम र निरन्त्रणबारे थाहा नगर उद्योग  बाणिज्य संघले सरोकारवालाको सहभागितामा छलफल कार्यक्रम आयोजना गरेको छ । थाहा नगरपालिकाका प्रमुख, उपप्रमुख, उद्योग बाणिज्य संघका पदाधिकारीहरू, होटल एसमेसियसन, प्रहरी लगायतको सहभागितामा बिहीबार दिउँसो छलफल भएको हो ।

छलफलकै क्रममा थाहा नगरपालिकाका प्रमुख लवशेर विष्टले नगरमा कोरोना संक्रमित भेटिएमा आइसोलेशनको अभावले व्यवस्थापनको समस्या भएको बताउनुभयो । थाहानगरमा पनि लकडाउन या निषेधाज्ञा जारी गर्नुपर्ने चर्चा  चलिरहेको बेला उहाँले केही दिनको लागि लकडाउन गरेर समस्याको समाधान नहुने धारणा राख्नुभयो । ‘एकदिन त बाहिर निस्कनै पर्छ, त्यसैले लकडाउन स्थायी समाधान होइन’ उहाँले भन्नुभयो ।

‘हामी आइसोलेशन त बनाउन सक्छौं, तर भेन्टिलेटरको सम्भावना छैन, जनशक्तिको पनि अभाव छ,’ उहाँले भन्नुभयो  । सदरमुकाममा भेन्टलेटरसहितको आइसोलेशन बनाउने र स्थानीय तहहरुमा कम्तिमा १० सिटको आइसोलेशन वार्ड बनाउने गरी प्रदेश कोभिड व्यवस्थापन केन्द्रमा छलफल गर्नेे उहाँले बताउनुभयो । 

हरेक वडामा कम्तिमा ७० जनाको स्वाब संकलन गर्नेगरी तयारी भइरहेको नगरप्रमुख बिष्टले जानकारी दिनुभयो ।  ‘त्यसपछि के रिपोर्ट आउँछ, सोही अनुसार निर्णय गर्छाैँ,’ उहाँले भन्नुभयो । भेन्टिलेटर र लक्षण देखिएका कोरोना संक्रमितहरुको जिम्मा प्रदेशले लिनुपर्ने उहाँको भनाइ रहेको छ ।

थाहाका उपप्रमुख खड्ग गोपालीले सबैको सुझावलाई समेटेर नगरपालिका अघि बढ्ने बताउनुभयो । 

कार्यक्रममा ईलाका प्रहरी कार्यालय पालुङका प्रमुख प्रहरी निरीक्षक विकासराज तामाङले डरका कारण शुरुमा मानसहरु घर बाहिर ननिस्किएको र बिस्तारै त्यो अनुशासन पालना हुन छाडेको बताउनुभयो । 

भीडभाड भैरहने हुनाले प्रहरी आफै पनि जोखिममा रहेको उहाँले बताउनुभयो । शुरुमा जनचेतनाको कार्यक्रम गर्ने र अटेर भएमा मास्क नलगाउनेलाई कारबाही गरिने उहाँले जानकारी दिनुभयो । 

कार्यक्रममा सहभागीहरुले फ्रन्टलाइनमा बसेकाहरुको पिसिआर परीक्षण गर्नुपर्ने, आइसोलेसन निर्माण गर्नुपर्ने, जनचेतनामुलक कार्यक्रम संचालन गर्नुपर्ने लगायतको धारणा राखेका थिए ।

कार्यक्रममा  त्रिभुवन राजपथ भई संचालन हुने सवारीसाधन, पदल यात्रुलगायतमा सचेतना फैलाउनु पर्नेसमेत छलफल भएको थियो । 

संघका अध्यक्ष कविराज खत्रीको सभाध्यक्षतामा भएको छलफलमा सहभागीहरुले आआफ्नो धारणा राखेका थिए ।