सुमो र स्कारपियो ठोक्किँदा ९ जना घाइते

मकवानपुरको भिमफेदी गाउँपालिका–६ जुरिखेतमा सुमो र भारतीय स्कारपियो एकआपसमा ठोक्किँदा ९ जना घाइते भएका छन् ।

शनिबार साँझ करिब ६ बजे  स्थित हेटौडा–भिमफेदी–कुलेखानी–काठमाडौँ सडक खण्डमा  काठमाडौँबाट हेटौंडातर्फ आउँदै गरेको ना.३च ६०५२ नम्बरको सुमोलाई सोही दिशाबाट ओभरटेक गर्ने क्रममा बिआर २२ एजेट २५१७ नम्बरको भारतीय स्कारपियोले ठक्कर दिँदा दुबै सवारीसाधन सडकमा पल्टिएका थिए।

घटनाको खबर प्राप्त हुनासाथ इलाका प्रहरी कार्यालय भिमफेदीबाट प्रहरी नायब निरीक्षक बिकु नारायण कासिछुवाको कमाण्डमा ट्राफिकसहित ८ जनाको टोली घटनास्थल पुगेको थियो। सशस्त्र प्रहरी बल कारागार सुरक्षा बेस भिमफेदीबाट सशस्त्र प्रहरी निरीक्षक सुरेश चौधरीको नेतृत्वमा ७ जनाको टोली समेत खटिएको थियो ।

उनका अनुसार दुर्घटनामा सुमो चालक पर्सा वीरगञ्ज महानगरपालिका–१४ बस्ने ४८ वर्षीय महाबुव आलम मन्सुरीको ढाडमा सामान्य चोट लागेको छ भने सुमोमा सवार हेटौडा उपमहानगरपालिका–५ शान्तीनगर निवासी ४१ वर्षीय न्युटन बहादुर क्षेत्री घाइते भएका छन्। उनीहरूको दाहिने खुट्टा, हात, टाउको र छातीमा सामान्य चोट लागेको प्रहरीले जनाएको छ। सुमोमा रहेका अन्य दुई जना भने सकुशल रहेको बताइएको छ।

स्कारपियोमा सवार ७ जनामध्ये चालक भारत बेतिया निवासी २६ वर्षीय सरुप पटेलको दाहिने खुट्टामा चोट लागेको छ। अन्य घाइतेहरूमा गौरव कुमार सराफ, रिसव कुमार सराफ, रेश्मी देवी सराफ, शिला देवी सराफ, ११ वर्षीय रवी कुमार सराफ र १५ वर्षीया नन्दनी कुमारी सराफ रहेका छन् ।

उनीहरूमध्ये अधिकांशलाई सामान्य चोट लागेको छ भने नन्दनी कुमारी सराफको अवस्था मध्यम रहेको प्रहरीले जनाएको छ।