विजुलीले जलुके उज्यालो, अन्य गाउँको कहिले हो पालो 

थाहानगरसँगै जोडिएको कैलाश गाउँपालिकाको जलुकेमा बल्ल बिजुली बलेको छ । कैलाशको वडा नं. १ मा पर्ने जलुकेमा विजुली पुगेपछि स्थानीयबासी अभूतपूर्व खुशी भएका छन् । खुशिले उनीहरुलाई अहिले नै ‘दशैं’ भएको छ । यही उपलक्ष्यमा उनीहरुले भोजसमेत गरेका छन् । घरघरमा विजुली बलेपछि गाउँ नै उज्यालो भएको छ । प्याट्ट स्वीच थिचेपछि आफूले चाहेको बेला बत्ती बल्दा जलुकेबासी दंग छन् ।

गाउँमा राष्ट्रिय प्रशारण लाइनबाट बिजुली बाल्न जलुकेबासीले अनवरत प्रयास गर्दै आएका थिए । पछिल्लोपटक विनासकारी भूकम्प गएको वर्षदेखि नै उनीहरुले पहल थालेका थिए । नेपाल विद्युत प्राधिकरण पालुङ वितरण केन्द्रको विजुली छिमेकी गाउँसम्म पुगेपछि उनीहरुलाई पनि विजुलीको उज्यालोमा बस्ने हुटहुटीले छोएको थियो । यो प्रयास पाँच वर्षपछि सफल भएको छ । 

जलुकेका धेरैले दियालोकै उज्यालोमा जीवन चलाए । मट्टितेल राखेर टुकी बाल्दा उनीहरुलाई नयाँ प्रविधि भित्रिएजस्तो लाग्थ्यो । मैनबत्ती बालेर खर्चले पुग्दैनथ्यो । पछिल्लो समय कतिपयले व्याट्रीबाट भान्सा र सुत्ने ठाउँ उज्यालो पार्थे । सोलार प्रविधिबाट बत्ती बाल्नेहरुले दिउँसो घाम लागे राती उज्यालो पाउँथे । आज यी सबै इतिहास भएको स्थानीय वाङ्गेल लामाले बताउनुभयो । 

अहिले जलुकेको ५५ घरमा विजुली बलेको छ । उनीहरुले विजुली बाल्न गाउँबाटै २ लाख ७५ हजार रुपिया उठाएका थिए । श्रमदान पनि उत्तिकै गरे । जम्माजम्मी १२ लाख रुपियाको लागतमा गाउँमा बिजुली पुगेको वडा अध्यक्ष पेमा लामाको भनाइ छ । 

जलुकेकी निरमाया सिन्जाली मगर अहिले ५२ बर्षकी भइन् । अहिलेसम्म हर्षले सायदै उनको आँसु खसेको थियो । घरमा विजुली बल्दा हर्षले आँसु खसेको उनले पत्तै पाइनन् । पहिलोपटक गाउँ नै झिलिमिली हुँदा गाउँका सबैको मुहार हँसिलो भएको छ । मोबाइल चार्ज गर्न पनि अर्को गाउँ जानु पर्ने बाध्यता अब हटेको उहाँले बताउनु भयो । 

जलुकेमा विजुली पुगे पनि वडाकै अन्य धेरै ठाउँ अझै अन्धकार छ । विजुली पुगेको छैन । वडाको  खोलाखर्क, फुलढुङ्गा, नौलेटोल लगायतको टोलमा अझै विजुली नपुगेको वडा अध्यक्ष लामाले बताउनु भयो । जलुकेमा विजुली पुगेपछि अब क्रमशः छिमेकी गाउँहरुमा पनि विजुली पु¥याउने  वडाको लक्ष्य रहेको छ । 

छिमेकी थाहा नगरपालिका विजुलीले झलमल्ल भए पनि कैलाश गाउँपालिकाको धेरै ठाउँमा अझै विजुली पुगेको छैन । गाउँपालिकाले बाटो(सडक) र विजुलीलाई प्राथमिकतामा राखेको गाउँपालिका अध्यक्ष टंक मोक्तानले बताउनुभयो । 
(यो सामग्री हजुरको खबर डटकमको सहकार्यमा तयार पारिएको हो ।)