रोशन र मधुसूदनको जोडिलाई छैटौं उपमेयर कप ब्याडमिन्टनको उपाधि

थाहा, मकवानपुर
थाहा नगरपालिकामा सम्पन्न छैटौं उपमेयर कप डबल्स मेन्स ब्याडमिन्टन प्रतियोगिताको उपाधि रोशन गोपाली र मधुसूदन चौधरीको जोडीले जितेका छन्। फाइनल खेलमा साविक विजेता नरेन्द्र र देवको जोडीलाई पराजित गर्दै उनीहरुले उपाधिसँगै नगद रु २० हजार, ट्रफी, मेडल र प्रमाणपत्र प्राप्त गरेका छन्।
साविक विजेताका रुपमा फाइनलमा उत्रिएका नरेन्द्र/देव उपविजेतामा सीमित भए। उनीहरुले नगद रु १५ हजारसहित शिल्ड, मेडल र प्रमाणपत्र प्राप्त गरे। प्रतियोगितामा उत्कृष्ट खेलाडीको उपाधि सुनिल विष्टले जिते। उनले नगद रु ५ हजारसहित ट्रफी प्राप्त गरे।
सान्त्वना पुरस्कार सुनिल/नवीन र नरेन्द्र/इसाकको टिमले प्राप्त गरेका छन्। उनीहरुलाई नगद र मेडल प्रदान गरिएको थियो।
१४ टिम सहभागी, उत्साहजनक प्रतिस्पर्धा
थाहा नगरपालिका–४ क्याम्पाडाडामा रहेको कबर्डहलमा सम्पन्न प्रतियोगितामा १४ टिमले सहभागिता जनाएका थिए। समापन समारोहका प्रमुख अतिथि उपप्रमुख भरत गोपालीले विजेता र अन्य विधागत खेलाडीहरुलाई पुरस्कार वितरण गरे।
"यस्ता प्रतियोगिताले स्थानीय स्तरमा खेलकुदको माध्यमबाट युवा सक्रियता बढाउँछ," उपप्रमुख गोपालीले भने, "खेलकुदमा लगानी नगरका युवाको उज्यालो भविष्यतर्फको कदम हो।"
समारोहमा प्रमुख प्रशासकीय अधिकृत सुरेन्द्र प्रधान, शिक्षा शाखा प्रमुख माधव विक्रम मल्ल, पालुङ भ्यालीहार्ट एकेडेमीका प्रिन्सिपल सुरेन्द्रमान प्रधान, फरक सोचका संयोजक यादवजंग रायमाझी, सामाजिक विकास शाखा प्रमुख अनिल लामिछाने लगायतको उपस्थिति रहेको थियो।
प्रतियोगिताको संयोजन थाहा नगरपालिकाले गरेको हो भने शिखर क्लब र फरक सोच सहयोगी संस्थाका रुपमा रहेका थिए। प्रतियोगितामा प्रेस तथा सञ्चार साझेदारका रुपमा पालिका प्रेस, थाहापाटी, लालखबर, थाहा टाइम्स, टिम टिभी, बाइरोड र रेडियो दामन रहेका थिए।

सुुसान्त श्रेष्ठ (च्याङ) को संयोजकत्वमा भएको समापन समारोहमा खेल सञ्चालनमा सहयोग गर्ने व्यक्ति तथा संस्थालाई सम्मान गरिएको थियो । कार्यक्रममा सहयोग गर्ने प्रायोजक तथा सहयोगीहरुलाई संयोजक श्रेष्ठले धन्यावद दिएका थिए ।