बकैया ४ का वडा अध्यक्ष दंगाल किर्तेको अभियोगमा पुर्पक्षकालागी जेल चलान

मकवानपुर । दिवंगत उमादेवी गुरुङको सम्पत्ति हडप्न नक्कली कागजात तयार पार्ने बकैया गाउँपालिका ४ नम्वर वडा अध्यक्ष राजन दंगाललाई जिल्ला अदालत मकवानपुरले पुर्पक्षका लागि थुनामा पठाएको छ ।

न्यायाधीश सकुन्तला कार्कीको इजलासले सरकारी काजगात किर्तेको अभियोग लागेका दंगाललाई थुनामा राखी अनुसन्धान अघि बढाउन आज आदेश गरेको जिल्ला अदालत मकवानपुरका अधिकृत दिलिप राईले जानकारी दिए । दंगाललाई आजै भीमफेदी कारागार पठाइएको छ ।

४ महिना अघि मकवानपुर जिल्ला अदालतबाट पक्राउ पुर्जी जारी भएता पनि उनी फरार थिए । राजनीतिक शक्तिको आडमा उनलाई प्रहरीले पक्राउ गरेको थिएन । उनलाई आज मात्रै अदालत उपस्थित गराइएको हो ।

वडाध्यक्ष दंगालले १८ मंसिर २०८० मा बकैया–४ निवासी ४६ वर्षका पूर्णबहादुर ब्लोनलाई दिवंगत उमादेवी गुरुङको नक्कली छोरा बनाएर मृत्युदर्ता र नाता प्रमाणितलगायतका कागजात तयार पारिदिएका थिए । मृतक उमादेवीको सम्पत्ति हत्याउन वडा अध्यक्ष दंगालले वडा कार्यालयबाट पटक–पटक सिफारिसका कागजातसमेत तयार पारिदिएका थिए ।

सोही घटनामा संलग्न पूर्णबहादुर ब्लोन र बकैया–४ कै रामबहादुर न्यासुरलाई जिल्ला अदालतले यस अघि नै पुर्पक्षका लागि थुनामा पठाइसकेको छ ।
सम्बन्धित मालपोत कार्यालयबाट मृतक उमादेवीको नाममा रहेको सम्पत्ति नामसारीको प्रक्रिया अघि बढाउँदै गर्दा घटना बाहिरिएको थियो ।