पालुङबाट तरकारी लिएर वीरगञ्ज जाँदै गरेको ट्रक दुर्घटनाग्रस्त,एकको मृत्यु एक घाइते

मकवानपुरको भीमफेदी गाउँपालिका–२ तिलटारस्थित त्रिभुवन राजमार्गमा तरकारी बोकेको ट्रक दुर्घटना हुँदा एक जनाको मृत्यु भएको छ भने चालक घाइते भएका छन्।

बुधबार राति करिब २:३० बजे पालुङबाट वीरगञ्जतर्फ तरकारी बोकेर जाँदै गरेको मधेश प्रदेश ०३–००२ ख ५०९५ नम्बरको ६ चक्के डिब्बा ट्रक वर्षा र हुस्सुका कारण ओरालो सडकमा चिप्लिएर अनियन्त्रित भएको थियो। ट्रक सडकबाट करिब एक सय मिटर तल चण्डी खोलामा खसेको हो।

दुर्घटनामा ट्रकमा सवार राक्सिराङ गाउँपालिका–९ का अन्दाजी ३६ वर्षीय अर्जुन कार्की गम्भीर घाइते भएका थिए। उद्धारपछि उपचारका लागि हेटौँडा अस्पताल पुर्‍याइएका उनलाई बुधबार बिहान ९:१५ बजे चिकित्सकले मृत घोषणा गरेका हुन्।

ट्रक चालक सोही स्थानका २३ वर्षीय रञ्जित कार्कीको दायाँ खुट्टा भाँचिनुका साथै शरीरका विभिन्न भागमा चोट लागेको छ। उनको अवस्था मध्यम रहेको प्रहरीले जनाएको छ। मृतक अर्जुन चालक रञ्जितका काका हुन्।

दुर्घटनाको जानकारी बुधबार बिहान करिब ६:३० बजे प्राप्त भएपछि प्रहरी चौकी भैंसे र इलाका प्रहरी कार्यालय भीमफेदीबाट ट्राफिक प्रहरीसहितको टोली घटनास्थलमा पुगेको थियो। प्रहरी निरीक्षक सनम मल्लको नेतृत्वमा खटिएको टोलीले दुवै जनाको उद्धार गरी उपचारका लागि अस्पताल पठाएको थियो।

ट्रकमा दुई जना मात्र सवार रहेको र घटनाबारे थप अनुसन्धान भइरहेको जिल्ला प्रहरी कार्यालय मकवानपुरका सूचना अधिकारी डीएसपी माधवप्रसाद काफ्लेले जानकारी दिए ।