थाहामा कर्मचारीलाई जोखिम भत्तावापत ४२ लाख खर्च

thaha

थाहा नगरपालिकामा कोरोना जोखिम व्यवस्थापनमा खटिने कर्मचारीहरुलाई प्रोत्साहनस्वरुप ४२ लाख रुपियाँ जोखिम भत्ता वितरण गरिएको छ । थाहामा कोरोना भाइरस रोकथाम तथा नियन्त्रण सचिबालय गठन भएदेखि गत साउन मसान्तसम्मको खर्च विवरणमा थाहा नगरपालिकामा कर्मचारी प्रोत्साहन तथा जोखिम भत्तावापत ४२ लाख ४७ हजार ४४४ रुपियाँ खर्च भएको जनाइएको छ ।

थाहा नगरपालिकाले विपद कोषअन्तर्गत अद्यावधिक गरी सार्वजनिक गरेको खर्च विवरण अनुसार औषधि उपकरण खरिदपछि सबैभन्दा धेरै रकम जोखिम भत्तामा खर्च गरेको देखिएको छ । नगरपालिकाले अहिलेसम्म कोराना जोखिम व्यवस्थापनमा एक करोड ४९ लाख ५१ हजार ५६४ रुपियाँ खर्च गरेको छ । जसमध्ये करिब ४८ लाख रुपियाँ बराबरको औषधि तथा उपकरण खरिद गरेको छ ।

त्यसैगरी जनशक्ति करारअन्तर्गत पाँच लाख १८ हजार खर्च गरेको छ भने क्वारेन्टाइन व्यवस्थापनमा करिब ३ लाख खर्च गरेको छ । नगरपालिकाले सार्वजनिक गरेको दैनिक प्रतिवेदनअनुसार राहत सामग्री खरिदमा पाँच लाख ५० हजार, गाडी भाडामा दुई लाख ७५ हजार, एम्बुलेन्स मर्मत र कम्पार्टमेन्ट निर्माणमा २ लाख २३ हजार र इन्धनमा एक लाख ५३ हजार रुपियाँ खर्च भएको पाइएको छ ।

त्यसैगरी संचारमा ४० हजार, प्रचारप्रसारमा ४३ हजार र भैपरीअन्तर्गत ९१ हजार रुपियाँ खर्च गरिएको छ । काममा आधारित राहत कार्यविधिअन्तर्गत रहेर थाहा नगरपालिकाले ३७ लाख ५० हजार रुपियाँ खर्च गरेको छ । थाहा नगरपालिकाको कोरोना रोकथाम तथा नियन्त्रण सचिवालयले प्रत्येक दिन प्रतिवेदन सार्वजनिक गर्ने गरेको छ ।