थाहाको दम्कीमा बन्ने भयो लक्ष्मी–नारायण मन्दिर

थाहा नगरपालिकाको वडा नं. ३ दम्कीमा लक्ष्मी–नारायणको मन्दिर बन्ने भएको छ । एक कार्यक्रमका बीच मन्दिरको औपचारिक शिलान्याससमेत गरी निर्माण कार्य अघि बढाइएको निर्माण समितिका अध्यक्ष कमलकुमार केसीले बताउनु भयो । 

वरपर अन्य मन्दिरहरु भए पनि लक्ष्मी–नारायणको मन्दिर नरहेको र धार्मिक पर्यटन प्रवर्धनमा समेत टेवा पुग्ने भएकाले लक्ष्मी–नारायणको मन्दिर निर्माण गर्न लागकोे केसीले बताउनुभयो ।

मन्दिर निर्माणको लागि केसीको अध्यक्षतामा उपाध्यक्ष सालिकराम कार्की, सचिब राजकुमार कुइकेल, कोषाध्यक्ष संगीता केसी र सहसचिब सानोबाबु तामाङ रहेको निर्माण समिति बनाइएको छ । त्यस्तै थाहा नगरपालिकाका राजनीतिक सल्लाहकार विष्णु विष्टको नेतृत्वमा एक सल्लाहकार समितिसमेत गठन गरिएको छ । सल्लाहकार समितिमा नगर कार्यपालिका सदस्य कविता कार्की, वडा सदस्य भरत लामा र स्थानीय समाजसेवी हर्कबहादुर खत्री रहनुभएको छ ।  

थाहा नगपालिका ३ नं. वडा कार्यालयको २ लाख रुपिया र स्थानीय चन्दा सहयोगबाट मन्दिर निर्माण गर्न लागेको समितिले जनाएको छ । जगको चार कोणमा नन्दा, भद्रा, जया र रिक्ता नामका कलश तथा बीचमा पूर्ण कलश राखेर विधिपूर्वक पूजा तथा मन्त्रोच्चारण गरी मन्दिरको शिलान्यास गरिएको थियो ।