अष्टमान स्मृति फुटबल: चन्द्रसूर्यले हान्याे ७ गोल

प्रथम अष्टमान बल स्मृति फुटबल कप–२०७७ को दोस्रो दिन शनिबार ५ खेल सम्पन्न भएको छ । थाहानगर–११ को सिर्जनशील टोल विकास संस्थाको आयोजनामा शुक्रबारदेखि शुरु फुटबलमा शनिबार पाँच खेल भएका हुन् ।

ठाडे युवा क्लब (ए) लाई लिति युवा क्लबले २–१ गोल गर्दै जित हासिल गरेको थियो । चन्द्रसूर्य युवा क्लब र ठाडे युवा क्लबबीच एकतर्फी प्रतिस्पर्धा भएको थियो । चन्द्रसूर्य युवा क्लबले ७ गोल वर्षाउँदा ठाडे युवा क्लबले गोल फर्काउन सकेन ।

राम्चे युवा क्लब धादिङ र तारुका युवा क्लब (बी) बीचको खेलमा राम्चेले तारुकालाई २–१ ले पराजित गरेको थियो । सोही दिन डाँडावास युवा क्लबले ६–० अन्तरमा वसन्त युवा क्लबलाई पराजित गरेको थियो । बाइरोड युवा क्लब धादिङले ४–१ अन्तरले तारुका युवा क्लब (ए) लाई हरायो ।
 १७ टिमको सहभागिता रहेको खेल लिग चरणमा रहेको छ । आइतबार भने सिर्जनशील युवा क्लब र तसर्पु युवा क्लबबीच नकआउट प्रतिस्पर्धा हुने वडा अध्क्षय किरणमान बलले जानकारी गराए ।

लिग चरणमा गतिशील युवा क्लबले पाँच गोल प्रहार गरी सिर्जनशील युवा क्लबलाई पराजित गरेको थियो । सिर्जनशील युवा क्लबले भने ३ गोलमात्र फर्काएको थियो । खेल कार्तिक ३० गतेसम्म सञ्चालन हुनेछ । जसमा प्रथम पुरस्कार ४० हजार नगदसहित, मेडल र सिल्ड, द्वितीय पुरस्कार २५ हजार नगद, मेडल र सिल्ड र तृतीय पुरस्कार १५ हजारसहित मेडल र सिल्ड छ ।