चित्लाङमा बन्यो महारुद्रेश्वर मन्दिर, उपप्रमुख गोपालीद्वारा उद्घाटन

थाहा नगरपालिकाको वडा नं. ९ चित्लाङमा हिन्दूहरुको आस्थाको केन्द्र शिबलिङ्ग सहितको महारुद्रेश्वर मन्दिर निर्माण गरिएको छ । 

थाहा नगरपालिका र स्थानीय लामिछाने समाजको संयुक्त लगानीमा चित्लाङको स्वच्छन्द भैरब नदीतटमा मन्दिर निर्माण गरिएको हो । 

थाहा नगरपालिकाका उपप्रमुख खड्ग गोपालीले एक समारोहका बीच आइतबार उक्त मन्दिरको उद्घाटन गर्नुभयो ।

निर्माण उपभोक्ता समितिका अध्यक्ष श्यामकृष्ण लामिछानेको सभाध्यक्षतामा भएको महारुद्रेश्वर मन्दिर उद्घाटन कार्यक्रममा बोल्दै उपप्रमुख गोपालीले थाहा नगरलाई धार्मिक पर्यटकीय क्षेत्रको रुपमा स्थापित गर्न यहाँको मठमन्दिरहरुको ठूलो महत्व रहेको बताउनुभयो । उहाँले मन्दिर निर्माणसँगै यसको संरक्षणमा जुट्न र पर्यटकीय हिसाबले प्रचारप्रसार गर्न समेत स्थानीयलाई आग्रह गर्नुभयो । 

उक्त अबसरमा थाहा नगरपालिका वडा नं. ९ का वडा अध्यक्ष पर्शुराम श्रेष्ठले ऐतिहासिक, धार्मिक, पुरातात्विक र साँस्कृतिक दृष्टिकोणले चित्लाङ महत्वपूर्ण रहेको उल्लेख गर्नुभयो । 

आइतबार चित्लाङमा महारुद्रेश्वर मन्दिरसँगै दाहसंस्कार स्थल(घाट) र धाराको समेत उद्घाटन गरिएको छ । 

कार्यक्रममा उपप्रमुख गोपाली, वडा अध्यक्ष श्रेष्ठ, वडा सदस्यहरु, निर्माण व्यवसायी जयराम लामिछाने, लामिछाने समाजका अध्यक्ष बासुदेव लामिछानेलगायतको उपस्थिति रहेको थियो ।