कृषकको उत्पादन सिधै उपभोक्तासम्म पुर्याउने नीति बनाउन काङ्ग्रेस थाहानगरको माग

असार ४/ कृषकले उत्पादन गरेका तरकारीको बिक्री वितरणमा बिचौलियाको अन्त्य गर्नका लागि आवश्यक पहल गर्न नेपाली काङ्ग्रेस थाहा नगर कमिटीले थाहा नगरपालिकालाई सुझाव दिएको छ । बिचौलियाका कारण कृषकले आफ्नो उत्पादनको उचित मूल्य नपाएको अवस्थामा कृषकको उत्पादन सिधै उपभोक्ता समक्ष पुग्ने वातावरण सृजना गर्नका लागि समेत नेपाली काङ्ग्रेस थाहा नगर कमिटीले आग्रह गरेको छ ।

नेपाली काङ्ग्रेस थाहानगर सभापति योगेन्द्रमान श्रेष्ठले नगर प्रमुख लवशेर विष्टलाई शुक्रवार सुझाव पत्र हस्तान्तरण गर्दै कृषकहरुलाई ब्यवशायिक कृषितर्फ अभिप्रेरित गर्नुपर्ने बताउनुभयो ।

सुझावपत्रमा  सामुदायिक विद्यालयहरुमा आवश्यकता अनुसारको दरवन्दीको ब्यवस्था गरी सरकारको नीति बमोजिम सरकारी बिद्यालयहरुमा माद्यमिक तहसम्म पूर्ण रुपमा निःशुल्क गर्न माग गरिएको छ।

साथै कोभिड-१९ नियन्त्रणलाई प्राथमिकता दिन आग्रह गर्दै कोभिड बिरामीहरुलाई निःशुल्क औषधि उपलब्ध गराउने नीति समावेश गर्न पनि सुझाव दिइएको छ ।
 
काङ्ग्रेस थाहा नगर कमिटिले सबै वडामा स्वच्छ खानेपानीको ब्यवस्था गर्नको लागि स्पष्ट नीति बनाउन आग्रह गरेकोछ । त्यस्तै कुन्छाल कुलेखानी सडकलगायत नगरका भित्री सडकहरुको स्तरोन्नती गरी सांस्कृतिक पर्याटनको विकासलाई जोड दिन अनुरोध गरेको छ ।
 
विपद् व्यवस्थापनमा पूर्वाधार सहित पूर्व तयारीमा रहन अनुरोध गर्दै प्राकृतिक प्रकोपबाट पीडितहरुलाई तत्काल राहत र उचित ब्यवस्थापन गर्ने नीति बनाउन समेत ध्यानाकर्षण गराएको छ ।

सुझावपत्रमा युवाहरुलाई सीपमूलक तालिमहरुको व्यवस्था गरि स्वरोजगार बनाउन तथा सरकारी कार्यालयहरुका सेवा प्रवाह चुस्त बनाइ भ्रष्टाचार मुक्त नगर बनाउनु पर्ने उल्लेख छ ।