कान्ति बाल अस्पताल प्रकरण:- कांग्रेस थाहानगर द्वारा स्वास्थ्य मन्त्रीलाई ज्ञापनपत्र

नेपाली काङ्ग्रेस थाहा नगर समितिले कान्ति बाल अस्पतालमा थाहा १० को बालिकाको अस्पतालको लापरबाही बाट मृत्यु भएपछि घटनाको सत्यतथ्य छानबिन र पिडित परिवारलाई उचित क्षतिपूर्तिको माग राख्दै स्वास्थ्य तथा जनसंख्या मन्त्री मोहन बहादुर बस्नेत समक्ष ज्ञापनपत्र बुझाएको छ।

 काठमाडौँको बाफल बस्ने थाहा नगरपालिका–१० मकवानपुरकी पाँच वर्षीया रेजिसा गोपालीलाई उच्च ज्वरो आएपछि आमा रीता गोपाली र हजुरबुवा कृष्णबहादुर गोपालीले १८ गते साँझ ५ बजे कान्तिको आकस्मिक कक्षमा पु-याउनु भएकोमा दुई घण्टासम्म कुर्दा पनि आकस्मिक उपचार नपाएपछि सोही साँझ ७ बजे रेजिसाको मृत्यु भएको घटनाको छानबिन गरि दोषीमाथी कडा कारबाहीको माग र पिडितलाई क्षतिपूर्तिको माग राख्दै स्वास्थ्य तथा जनसंख्या मन्त्री मोहन बहादुर बस्नेत समक्ष ध्यानाकर्षण पत्र बुझाएको नेपाली कांग्रेस थाहा नगर सभापति प्रमोद कृष्ण जोशीले बताउनुभयो।
जोशीले, मन्त्री बस्नेतले कान्ति बाल अस्पतालमा भएको बालिका मृत्यु प्रकरणमा दोषी देखिएकालाई कारबाही गर्ने प्रतिबद्धता व्यक्त गर्नुभएको बताउदै 
मन्त्रीले  घटनाका दोषी चिकित्सक, स्वास्थ्यकर्मी र कर्मचारीलाई कडा कारबाही गरिने प्रतिबद्धता व्यक्त गर्नुभएको जानकारी दिनुभयो।

 कान्ति अस्पतालको घटनाका विषयमा जानकारी पाएको भन्दै यस विषयमा तत्काल स्वास्थ्य तथा जनसङ्ख्या मन्त्रालयका सचिव डा. रोशन पोखरेललाई घटनाका विषयमा छानबिन समिति बनाएर दोषीलाई कडा कारबाही गर्न निर्देशन दिइसकेको मन्त्री ज्यु बाट जानकारी भएको सभापति जोशीले  बताउनुभयो। 

ज्ञापनपत्र बुझाउन नगर सभापति जोशीको नेतृत्वमा भरत लामा, रामकृष्ण गमाल, विक्रम गोपाली, कुलचन्द्र अर्याल, श्रीकृष्ण केसीलगायतका काँग्रेस नेता तथा कार्यकर्ताहरुको सहभागिता रहेको थियो ।

यसअघि स्वास्थ्य अवस्था जटिल भएकी बालिकालाई आकस्मिक कक्षबाहिर घण्टौँ राखिएको र उपचार नपाई ज्यान गएको भन्ने खबर सार्वजनिक भएको थियो। स्वास्थ्य मन्त्रालयको निर्देशनपछि कान्ति बाल अस्पतालले डा. प्रकाश जोशीको संयोजकत्वमा नर्सिङ अधिकृत अजिता सिलवाल र शाखा अधिकृत डमरू दाहाल सदस्य रहेको छानबिन समिति गठन गरेको छ।