इन्द्रसरोवर गाउँपालिकाकाे विकासका लागि मन्त्री  फुयालसँग छलफल

बागमती प्रदेशका भौतिक पूर्वाधार विकास मन्त्री रामेश्वर फुयालसँग इन्द्रसरोवरमा छलफल भएको छ । मन्त्री रामेश्वर फुयालको प्रमुख आतिथ्यतामा इन्द्रसरोवर गाउँपालिका वडा नं. २ कुलेखानीमा बैठक गरिएको हो । इन्द्रसरोवरमा जल महोत्सव गरी इन्द्रसरोवरलाई जल क्रियास्थलको रुपमा विकास गर्ने, इन्द्रसरोवरको कुलेखानीदेखि मार्खुसम्मको क्षेत्रमा सडक सौन्दर्यीकरण गर्ने, जनसमुदायको परिचालन गरी मार्खुसम्मको बाटो सफा गर्ने, फुल र विरुवा रोप्ने, स्मारक निर्माण गर्ने, कुलेखानी देखि हुमाने सडक सुधार गर्ने लगायतका विषयमा छलफल गरिएको हो । व्यवस्तताका कारण आज प्रस्तुत गरिएको प्रस्ताव तथा विषयमा यहि मंसिर १२ गते बृहत छलफल गर्न योजना तर्जुमा बैठक बस्ने गरी मिति तय गरिएको छ । आज भएको बैठक र बैठकका विषयलाई पूर्णता दिन आगामी १२ गतेको लागि तयारी गरिने गाउँपालिकाका अध्यक्ष जीवन लामाले बताउनु भएको छ ।
इन्द्रसरोवर ताल वरपरको क्षेत्रमा सरसफाइ गर्न होटल व्यवसायी, स्थानीय, जनप्रतिनिधिहरु सबै जिम्मेवार हुुनुपर्ने मन्त्री फुयालले बताउनुभयो । बागमती प्रदेशको सपना ‘वातावरणमैत्री बागमती प्रदेश’ बनाउने रहेको बताउँदै विद्युतीय वस चलाउने, पोष्ट बहादुर बोगती सुरुङ मार्ग निर्माण, भैसे–भिमफेदी सडक विस्तार लगायतका कार्य भैरहेको र टेन्डर गर्न बाँकी रहेको काम पनि चाँडै टेन्डर गर्ने मन्त्री फुयालले बताउनुभयो । स्थानीय, प्रदेश र सघीय सरकारको समन्वयमा विकासका विविध काम भइरहेको भएपनि विकास निर्माणका लागि जनसमुदायको पनि एउटा महत्वपूर्ण जिम्मेवारी रहेको भन्दै मन्त्री फुयालले जनसमुदायलाई बाटोमा पानी नपठाउन आग्रह गर्नुभयो । उहाँले स्थानीय सरकारले हिउँदमा सडक सफाईको जिम्मा लिनुपर्ने बताउनुभयो ।
इन्द्रसरोवर गाउँपालिकाका अध्यक्ष जीवन लामाको अध्यक्षतामा सञ्चालित बैठकमा श्री क्युवेक व्याट्रि नं. १ राजदल गणका प्रमुख मेजर शशी बुढाथोकी, वडा नं. २ का वडाध्यक्ष राजुमान महर्जन, वडा नं. ४ का वडाध्यक्ष धनवीर स्याङ्तान, वडा नं. २ का वडा सदस्य बैकुण्ठ थापामगर, समाजसेवी देवकृष्ण पुडासैनी, गाउँपालिकाका कर्मचारी लगायत विभिन्न वडाका युवा क्लब र सहकारी संस्थाका प्रमुख तथा प्रतिनिधिहरुको सहभागिता रहेको थियो ।